നിങ്ങളുടെ വൃക്കകളുടെ പ്രവര്ത്തനം ശരിയായ രീതിയിലാണോ എന്ന വിലയിരുത്തൽ, മുന്കൂട്ടിയുള്ള രോഗനിര്ണയത്തിന്റെ പ്രാധാന്യം, വൃക്കകളുടെ സംരക്ഷണം- ഈ മൂന്ന് ആശയങ്ങൾ വളരെ അർഥ പൂർണമാണ്.
കാരണം, നമ്മുടെ ശരീരത്തിലെ സുപ്രധാന അവയവങ്ങളില് വൃക്കകളും ഉള്പ്പെടുന്നു. വൃക്കകള്ക്ക് തകരാർ സംഭവിച്ചാല് അതു ജീവിതനിലവാരത്തെ പ്രതികൂലമായി ബാധിക്കുന്നു. കൂടാതെ, വൃക്കകളുടെ ചികിത്സ ചെലവേറിയതാണ്.
രോഗലക്ഷണങ്ങൾ എപ്പോൾ?
75% വൃക്ക തകരാര് സംഭവിച്ചശേഷം മാത്രമാണ് രോഗലക്ഷണങ്ങള് പ്രകടമാകുന്നത്. അതിനാല് വൃക്കയുടെ ആരോഗ്യം നിര്ണയിക്കുന്നതില് രോഗലക്ഷണങ്ങള് പ്രധാന പങ്കു വഹിക്കുന്നില്ല.
വൃക്ക തകരാറിനു സാധ്യത കൂടുതലുള്ളവരില് മുന്കൂട്ടി ചില പരിശോധനകള് ചെയ്യേണ്ടതാണ്.
വൃക്ക തകരാര് സാധ്യത
- പ്രമേഹ രോഗികള്/ഡയബറ്റിസ് മെലിറ്റസ് ഉള്ള 40% രോഗികള്ക്ക് വൃക്ക സംബന്ധമായ പ്രശ്നങ്ങള് ഉണ്ടാകാന് സാധ്യത കൂടുതലാണ്.
- അമിത രക്തസമ്മര്ദം ഉള്ളവരില്.
- ഗ്ലോമെറുലാർ നെഫ്രൈറ്റിസ് (Glomerular Nephritis) ബാധിച്ചവര്ക്ക് അല്ലെങ്കില് മൂത്രത്തില് രക്തമയം, പ്രോട്ടീനൂറിയ വന്നവര്ക്ക് ഭാവിയില് വൃക്കതകരാര് സാധ്യത കൂടുതലാണ്.
മൂത്രാശയ അണുബാധ
കുട്ടികളില് മൂത്രാശയ അണുബാധ ഉണ്ടായാല് ഭാവിയില് വൃക്ക തകരാറിനു സാധ്യത കൂടുതലാണ്.
മൂത്രാശയത്തില് കല്ലുകള്
- മൂത്രാശയത്തില് കല്ലുകള് ഉള്ളവര്ക്കും ഭാവിയില് വൃക്കരോഗസാധ്യത കൂടുന്നു.
- വൃക്കകളില് മുഴ ഉള്ളവര്ക്കും പാരമ്പര്യമായി വൃക്ക തകരാര് ഉള്ളവര്ക്കും അമിതവണ്ണം ഉള്ളവര്ക്കും ഭാവിയില് വൃക്ക രോഗസാധ്യത കൂടുതലാണ്.
ആദ്യഘട്ടത്തിൽ കണ്ടെത്തണം
വൃക്കരോഗ സാധ്യതയുള്ളവരിൽ മുന്കൂട്ടിയുള്ള പരിശോധനകളിലൂടെ നേരത്തേതന്നെ രോഗനിര്ണയം നടത്താന് സാധിക്കുന്നു.
ഇവരില് കൃത്യമായ ഇടവേളകളില് പരിശോധന നടത്തി ആദ്യഘട്ടത്തില് തന്നെ രോഗനിര്ണയം നടത്തേണ്ടത് അനിവാര്യമാണ്.
വിവരങ്ങൾക്ക് കടപ്പാട്: ഡോ. ജേക്കബ് ജോർജ്
സീനിയർ കൺസൾട്ടന്റ് നെഫ്രോളജിസ്റ്റ്, എസ്യുറ്റി ഹോസ്പിറ്റൽ, പട്ടം, തിരുവനന്തപുരം.